TE ANAPOGI (#10960)

*A te Kitáb-i-Aqdas e fai mai: Ko oti ne fakatonu a koe ke talo kae anapogi mai ite kamataga ote tausaga matua [15 tausaga]; mea ne ko oti ne fakatonu mai ne te Atua, tou Aliki mot e Aliki o ou tuaa.  A ia te la fano malaga, e masaki, mo ia tela e nofo mo tamaliki foliki io me koi susu a tena tama e se aofia ite anapogi…Anapogi mai i meakai mo mea inu mai ite saeega o te laa kite toga o te laa, kae faeteete i ou manakoga ma fai ne ia ke se maua ne koe a te alofaaga tenei tela ko oti ne tusi i te Tusi.”
Te taimi o te Anapogi mai ia Mati2 kia Mati 20.

Mea nei, O Toku Atua, ko aso muamua ko la ko oti ne fai mai ne Koe ki Au fagasele ke tautali i te Anapogi.  Au e akai atu kia Koe e ui mai i a Koe Loa, mo ia tela ko oti ne anapogi mai i luga i tena alofa mo Koe kae pela foki mo te mea e fiafia Koe ki ei – kae seai ko te manakooga fua o ia, io me ko te mataku i Tau faka-salaaga – kae ona ko Ou igoa tafasili ite maluga, mo uiga tafasili i te lei, o fakama Au tavini mai ite alofa ki so se mea na loa ko Koe kae ke futi latou ke pilipili ki te Fale Tapuaki o mainaaga o Tou nofo mai mo te Nofoaga o te ulualiki o Tou tafatasi.  Faka-maina a olotou loto, O toku Atua, mo te mainaaga o Tou poto kae fakamaina a olotou mata mo kavei ote Fetu Ao te la e sulu mai ite sikulagi o Tou Finagalo.  E fai a te mea e loto Koe ki ei. Seai aka foki se Atua na ko Koe, Te Matagofie-Katoatoa, Te la e sala a Tena fesoasoani ne tagata katoa.
     Fesoasoani kia latou. O toku Atua, ke fai ne latou Koe ke manumaalo kae faka-maluga a Tau Muna.  Fai latou ke fai pela me ne lima o Tau Fakatokaaga i vasia o Au tavini, kae fai latou mo tino fakaasi a Tau talitonuuga mo Au faka-iloaga i vasia o tagata, i se atamai te la ka fakafonu a te lalolagi katoa i te masausauaaga o Koe mo tavaeega fakatasi mo Au faka-talitonuuga.  Ko Koe, e tonu, ko te Alofa-Katoatoa, te Toe Tafasili ite Maluga, te Maalosi, te Mafi, mo te Alofa-Kaimalie.

-Bahá'u'lláh
-----------------------

TE ANAPOGI (#10961)

I te Igoa o Ia Te la ko oti ne feagaiiga mai i Tusi ate Atua, te Iloa-Katoatoa, te Logo-Katoatoa!  A aso o te anapogi ko oko mai tela a tavini ka siomia ne latou a Tou nofoga-tupu kae ko oko atu ki Ou mua ko oti ne anapogi.  Fai atu:  O te Atua o igoa mo Ia ne faite ne Ia a te lagi mo te lalolagi!  E akai atu kia Koe i Tou Igoa, te Matagofie-Katoatoa, ke talia te anapogi a latou ko la ne anapogi ona ko te alofa mo Koe mo te mea e manako ki ei a Tou fiafiaaga-lei kae ko oti foki ne fai ne latou a te mea ne fakatonu kia latou mai i Au Tusi mo Tapeleti.  Au e akai totuli kia Koe ona ko latou ke fesoasoani mai kia au i te faka-laueefaga o Tau Fakatokaaga kae fai au ke mautakitaki i Tou alofa, ko oku kalafaga ke se olo seke ona ko te gasuesueega o Au mea faiite.  E tonu, a Koe ko te maalosi i luga i sose mea e finagalo Koe kiei.  E seai aka foki se Atua na ko Koe, te Fai-Mea-Vave, te Maalosi-Katoatoa, te Toe Maukoloa, te Favavau o Aso.

-Bahá'u'lláh
-----------------------

TE ANAPOGI (#10962)

Au e akai totuli kia Koe, O toku Atua, ona ko Tau Fakailoga mafi, mo te fakaasiiga o Tou alofa i vasia o tagata, ke se ave au keatea mai ite mataloa o te fakai lasi o Tou nofo mai, kae ke se faka-fanoanoa oku faka-moemoeega ko oti ne faka-saga ki luga i faka-asiiga o Tou alofa kaimalie i vasia o Au mea faiite.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, koTe Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino ite lalolagi nei mo te lalolagi ma vau.
     Au e akai totuli kia Koe, O toku Atua, ona ko Tou Leo tafasili i te suamalie mo Tau Muna tafasili i te maluga, ke faka-pilipili atu au ki te faitotoa o Tou mataloa, kae fai aka au ke se to mao mai ite ata o Tou alofa-kaimalie mo te fakamalu o Tou alofa-lauefa.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, ona ko te matagofie o Tou fulumata maina mo te mainaaga o te moli o Ou mata, tela e sulu mai ite sikulagi tafasili ite maluga, o futi atu au i te manogi gali o Tou gatu, kae fai aka au ke inu mai i te uaina filifiligina o Tau faipatiiga.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.  
     Au e akai totuli kia Koe, O toku Atua, mai i luga i Tou laulu tela e gasuesue mai mua i Ou mata, pe la mo Tau pene tafasili ite maluga te la e gasuesue i laupepa o Au Tapeleti, o faka-matala a te manogi gali mo uiga lilo ote maalo o Tau foafoaaga, ko te mea ke fakatu aka au ki luga ke tavini kia Tau Fakatokaaga kae ke se siga au ki tua, ke se lave au i faka-masakooga a latou ko  la e muimui ki Au fakailoga a ko saga fakaatea mai i Ou mata.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, ona ko Tou Igoa tela ko oti ne fai ne Koe me kote Tupu o Igoa, tela ne pokotia kii iei a tino katoa ite lagi mo latou katoa ite lalolagi, ke mafai ne au o kilo ki te Fetuao o Tou Gali, kae tuku mai kia au a te uaina o Tau faipatiiga.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, mai ite Tapaneki o Tau afioga i luga i toe koga maluga matagofie, mo te Fakamalumalu o Tau Faka-asiiga i luga i toe mauga maluga, o fesoasoani kaimalie mai kia au ke fai ne au a mea ko la ko oti ne finagalo kae manako Koe kae fakamaina a te pogai o Koe.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, mai i Tou Gali tela e sulu maina mai iluga ite sikulagi o te fakavavau, se Gali i te taimi loa tela e fakaasi iei, a te maalo o gali e ifo o tapuaki, kae faka-lauefa atu i se maalosi pe la mo tagi o leo e uke, o tuku mai ko te mea ke mate au ki mea katoa ko la ea aku kae ola ki so se mea tela e ia Koe.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko e Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, mai i te Fakaasiiga o Tou Igoa, te Fagasele-Tokotasi, Tela Mai i ei a loto o Au fagasele ne malemu ako agaaga of latou katoa I te lalolagi ne lele ki luga, o fesoasoani mai ke masaua Koe i vasia o Au mea faiite, kae fai atu Ou tavaeega i vasia o tino.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, on ko te gaseseega o te Lakau Ola Faka-te-lagi mo musmusuuga o Tau faipatiiga i te maalo o Ou igoa, ke kave keatea au mai i sose mea te la ka se fiafia Koe ki ei, kae futi atu au ke pili ki tulaga te la a Ia ko te Aso foou o Au fakailoga ko sulu atu ki mua.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, mai i te Tusi tela, i taimi loa tela ne kave atu mai i te muagutu o Tou finagalo, ne fai ne ia a vasa ke sou, mo matagi ke agi, mo fuaga-lakau ke fakaasi, a ko lakau ko ola mai, ako mea katoa mai mua ke tanumia, a ko veli katoa ke maofa ki lalo, a ko latou ko la e pikimau kia Koe ke fakavave atu kite mainaaga o mata ote olotou Aliki, te Se-mafai o Taofiigia, o fakailoa mai kia au a mea e funa i maumea o Tou poto kae fakalilo i koga e teu iei a Tou atamai.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, ona ko te afi of Tou alofa te la e ave keatea a te fia moe mai i mata o Au tino filifiligina mo Au fagasele, kae mai i luga foki o masausauuga mo tavaeega a latou mo Koe i te itula o te vaevao, o fakapatino mai au pela mo latou ko oti ne maua ne latou a te mea tela ko oti ne aumai ne Koe i Tau Tusi kae fakaasi e auala atu i Tou finagalo.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, toku Aua, ona ko te mainaaga o Ou mata tela mai i ei ne futi maalosi a tino ke fakapili atu kia Koe ke fetaui mo te mae o Au fakatonuuga, a ko latou ko la e piki-mai kia Koe o fakasaga atu ki pelu o Ou fili i Tou auala, ke tusi ifo ki lalo i Tau Pene tafasili ite maluga mo au a mea ko la ko oti ne tusi ne Koe mo latou fakamaoni mo latou flifiligina.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, ko te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.
     Au e akai totuli kia Koe, O toku Atua, ona ko Tou Igoa te la mai iei ne fakasalalau ne Koe a te kalaga ki Au fagasele, mo latou ko la ko oko loa i te fia oko atu kia Koe, mo te tagi a latou ko la e fiafia ona kote pili au o latou kia Koe, mo te tagitagi o latou ko la e piki-mmau kia Koe, kae mai i ei ko oti ne fakataunu ne Koe a manakoga, ona ko Tou alofa mo Au mea-alofa, kae ona ko Tou Igoa ne fanaka i ei a te vasa o te fakamagalo i Ou mata, mo kaumana o Tou alofa-lauefa ko to ifo pela me se vaiua iluga i Au tavini, o tusi aka ki lalo ko tino takitasi katoa ko la ko oti ne fuli atu kia Koe, kae tautali kite Anapogi ne fakatonu mai ne Koe, a te taui mo latou kola e se tivili vagana ko fakasaoloto ne Koe, kae ne fakaseai katoa a mea a latou ona ko Tou auala mo te alofa kia Koe.
     Au e akai totuli kia Koe, O toku Aliki, ona ko Au failoga, mo Au fakasiiga manino, mo te mainaaga sulu o te Fetuao o Tou Gali, mo Ou Kaula, ke solo keatea a agasala a latou ko la ne piki-mau ki Au tulafono, kae tautali ki te mea ko oti ne fakasino ne Koe mai I Tau Tusi.  E lavea ne Koe au, O toku Atua, e taofi ki Tou Igoa, ko te Toe Tafasili i te Mana, ko te Toe Tafasili i te Maina, te Toe Tafasili i te Mafi, ko te Toe Tafasili ite Lasi, ko te Toe Tafasili i te Maluga, ko te Toe Tafasili i te Silisili-ese, kae piki mmau ki te kapa o te gatu te la ne piki katoa ki ei a tino i te lalolagi nei mo te lalolagi ma vau.

-Bahá'u'lláh
-----------------------

TE ANAPOGI (#10963)

Ke Tavaegina Koe, O te Aliki toku Atua! Au e akai faka-maulalo kia Koe i te Faka-asiga nei te la ne fuli te pogisa kite mainaaga, tela ne faite a te Fakatokaaga Faka-fokifoki tenei mo te faka-asiiga o te Tapeleti Tusia, mo te sukeega o te Epa Mafola-lauefa, ke tuku ifo ki luga ia au kae ki luga foki ia latou ko la e fakatasi mai te la ka mafai ne matou o eva ki loto i lagi o Tou matagoefie maluga, kae fakamaa matou mai i pisipisiiga o fifiiga ko la ko oti ne faka-lavelave ne latou a tino fa-lotolotolua mai i te ulu ki te tapaneko o Tou tafatasi.
     Au ko ia, O toku Aliki, te la e piki mau ki te kafanoa o Tou alaofa-kaimalie kae mau ki te fakaotiiga o Tou alofa mo fakapitoga.  Fakaeke aka ne Koe mo au au pela foki mo oku fagasele ate lei o te lalolagi nei mo te lalolagi ma vau.  Avatu kia latou, a te Mea-alofa Funaa te la ko oti ne fakamana ne Koe mo latou filifilia mai i Au mea-faiite.
     Mea nei, O toku Aliki, ko aso koa oti ne fakatonu ne Koe Au tavini ke tautali ki te anapogi.  Faka-manuia kia ia te la e fakamalu katoatoa ki te anapogi ona ko Koe mote liakina katoatoa o mea katoa na ko Koe.  Fesoasoani mai au pela foki mo latou, O toku Aliki, ke fakalogo kia Koe kae tausi ki Au faka-nofonofoga.  Koe, e tonu, e iai ate maalosi o fai a te mea e filifili ne Koe.
     E seai se Atua na ko Koe, te Iloa-Katoatoa, te Atamai-Katoatoa. Tavaeega katoa mo te Atua, te Aliki o lalolagi katoa.

-Bahá'u'lláh
-----------------------

TE ANAPOGI (#10964)

Mea nei, O toku Atua, ko aso ko la ko oti ne fakatonu mai ne Koe ko Au tavini ke tautali i te Anapogi.  Mai iei ne faka-lakei ne Koe a te faka-tomuaaga o te Tusi o Au Tulafono tela ne fakaasi ki Au mea faiite, kae faka-fonu katoa a Koga-Tausi o Au tulafono i mata o latou katoa i Tou Lagi mo latou katoa i luga i Tou lalolagi.  Ko oti ne fakafonu a itula taki tasi katoa o aso mo uiga lei fakapitoa, fui faka-matala kia latou katoa vagana ko Koe, Tela Tena poto e aofia iei a mea faiite katoa.  Ko oti, foki, ne faka-sino ki agaaga taki tokotasi katoa a se tusaga o te uiga lei tenei pela loa mote Tapeleti o Tau faka-tonuuga mo Mataupu Silisili o Tau faka-masinoga e se mafulifuli.  Lau pepa taki tasi o Tusi mo Mataupu Silisili konei ko oti ne tufatufa ne Koe ki tino taki tokotasi katoa o te lalolagi.
     Mo au fagasele talitonu ko oti ne fai ne Koe, pe la loa mo Tau tulafono, e fakaavanoa, i vaveao katoa, a te ipu o Tou masauaaga, O ko Koe Tela ko te Pule o pule!  Ko latou konei ko fonufonu i te uaina o Tou atamai tuafia tela ko liakina ne latou a olotou moeega ona ko te olotou finafinau o fakamanuia Ou tavaeega kae faka-maluga Ou uiaga, kae fakaseai a te olotou malolooga ona ko te loto maalosi o faka-pilipili atu kae aofia i loto iTou alofa.  Olotou mata, i taimi katoa, ko fakasaga tonu atu ki te Kamataga-ote-Aso o Tou alofa-kaimalie, a ko faka-saga atu foki ki te Ulu-Vai o Tau faka-maalosiiga.  To ifo a te vaiaua, na la, ki luga ia matou mo latou mai i kaumana o Tou alofa-kaimalie a te mea te la e ttau ite fuafuaaga i te lagi o Tou alofa o te kaimalie.
     E maluga Tou Igoa, O toku Atua!  Mea nei ko te itula ko oti ne taala ne Koe a mataloa o Tou alofa i mua o mata o Au mea faiite, kae taala foki fakalauefa a mataloa o Tou alofa-atafai kia latou katoa i Tou lalolagi.  Au e akai totuli, ona ko latou katoa ko la ne maligi olotou toto i Tou auala, ona kote olotou finafinau kia Koe, ne fakaseai a latou a mai i Au mea ola-katoa, a ko latou foki ko aveaia ne te manogi gali o Tau faka-maalosiiga, tela a so se totooga o fuaitono o latou ko lagi atu a Ou tavaeega kae polepole i te faka-msausauaaga o Koe, ke se taofi mai ia matou a mea ko la ko oti ne tusi mai i loto i Tau Fakasiiga – se Faka-asiiga tela tena maalosi e fai ne ia so se lakau ola ke tagi pela mo te Kaaga o te Lakau ne fakaasi kia Mose mai anamua, Tela ne sautala mo Koe, se Faka-asiiga ne mafai i ei a sose kilkili o toe fakaleo a Ou tavaeega, a ko fuafatu ko fakamana ne latou a Koe pela mo taimi i aso o Muhammad, Tou Taugasoa.
     Latou konei, O toku Atua, ko la ko oti ne faka-mafai ne Koe o taugasoa kia Koe kae sokotaki mo Ia Tela ko te Fakaasiiga o Koe.  A matagi o Tou finagalo ko oti ne tufatufa atu ki tua atu ke oko ki taimi ko toe aumai fakatasi mai lalo i Tou ata, kae fai atu ke ulu ki loto i laumanafa o Tou fale.  Tenei la ko oti ne fai ne Koe ke nofo mai lalo o te malu o te fakamalu o Tou alofa-kaimalie, fesoasoani aka kia latou ko te mea ke maua ne latou se tulaga e ttau ki te tulaga o latou.  Fai aka latou ke se aofia, O toku Aliki, ia latou ko la ona ko te fiafia ite pili o latou kia Koe, ne taofigia mo aa e lavea ne latou Ou mata, kae, mai i luga ite fetauiiga mo Koe, ne fakaseai mai ia latou a Tou nofomai.
     Mea nei ko Au tavini, O toku Aliki, ko la ne ulu fakatasi mo Koe, ite Toe Fale-puipui Tafasili te Takutakua, ko la ne tautali ite Anapogi i loto i ona olo pe la mo te mea ko oti ne fakatonu ne Koe a latou mai i Tapeleti o Au puleega mo Au Tusi i Tau fakatonuuga.  Tuku ifo, ki luga ia latou ke mafai o fakaseai lele mai ia latou a mea ko la e se fiafia Koe ki ei, ko te mea ke piki-mau katoatoa kia Koe, kae motu a latou mai i mea katoa na loa ko Koe.
     To ifo, kia matou, O toku Atua, a te mea te la e lei mai i Tou alofa-kaimalie kae ttau foki mai i Tou alofa-lauefa.  Fakamafai aka matou, O toku Atua, ke ola i Tou masauaaga kae ke mate i te alofa mo Koe, kae aumai kia matou a mea-alofa o Tou nofomai i lalolagi katoa mai tua, lalolagi ko la e se iloa ki tino katoa na ko Koe.  Ko Koe a te motou Aliki mo te Aliki o lalolagi katoa, mo te Atua o latou katoa ko la ite lagi mo latou katoa ko la ite lalolagi.
     E puke ne Koe, O toku Atua, a mea ko la e pokotia iei Au fagasele i Ou aso.  Tou matagofie ko taku molimau!  A te leo fanoanoa o Au fagasele filifilia ko oti ne faka-maluga aka i Tou maalo.  A niisi ne faka-lavegia ne latou ko la e se talitonu i Tou fenua, kae taofi foki ne latou ke seai se faka-pilipili atu kia Koe kae ke se oko atu ki te fale o Tou matagofie. A ko niisi ne maua ne latou o faka-pilipili atu kia Koe, kae ne taofi latou mo aa e lavea ne latou Ou mata.  A ko niisi foki ne taliagina, i te olotou loto finafinau o taumata ki Ou mata, ke ulu atu ki loto i Tou fale, ako te mea ne talia ne latou ko veli o mafaufauuga o Au mea ola mo mea see ne fai ne te kau teke i vasia o Ou tino ke fakanofo i te olotou vasia mo Koe.
     Mea nei ko te itula, O toku Aliki, ko oti ne fai ne Koe ke sili atu i so se itula aka, kae ko oti ne faka-kaaiga ki filifiliiga i Au mea faiite.  Au e akai totuli kia Koe, O toku Atua, ona ko Koe mo latou, ke fakaeke mai i se taimi i tausaga nei a te mea tela ka faka-maluuga iei a Ou fagasele. Ke fai aka ne Koe, i te vasia taimi o tausaga nei a te mea tela ka mafai ne te Fetuaao o Tou maalosi ke sulu maina i luga o te sikulagi o Tou matagofie, kae fakamaina atu ki te mafi o Tou nofoga-a-tupu, a te lalolagi katoa.
     Fai aka ke manumaalo a Tau Fakatokaaga, O toku Aliki, kae faka takavale ne Koe Ou fili.  Tusi ifo ki lalo, na la, mo matou ate lei ote olaaga nei mo te olaaga ma vau.  A koe kote Tonu, Tela e iloa a mea funa.  Seai aka foki se Atua na ko Koe, te Fakamagalo-Katoatoa, te Alofa-Lauefa Katoatoa.

-Bahá'u'lláh
-----------------------

TE ANAPOGI (#10965)

Te Matagofie ea ia Koe, O te Aliki toku Atua!   Mea nei ko aso ko la ko oti ne fakatonu ne Koe a tagata katoa ke tautali ite Anapogi, tela ona koi a ka fakama a olotou agaaga kae fakamaa katoa latou mai i te piki ki so se tino na loa ko Koe, te la ma i olotou loto ka mafai ne latou o olo atu ki luga auaa ko ttau ki te fale o tau afioga kae e mafai foki o ttau ki te nofoga ote faka-asiiga o Tou tafatasi.  Aumai, O toku Aliki, ko te anapogi tenei ke fai pela me se vaitaafe o te vai-ola kae ke fua mai i ei ate uiga tela ko oti ne fakaeke aka ne Koe.  Fakamaa aka ne Koe i te mea e mafai a loto o Au tavini ko la ne see mafai ne te masei o te lalolagi o fakatuai mai i te fuli atu ki Tou Igoa Matagofie-Katoatoa, kae ko la ko nofo aunoa mo se mafuli ne te logoaa mo te pakalaga o latou ko la ko fulitua mai i Au faka-iloga tafasili i te malifalifa ko la ne aumai tasi mo te oko mai o Au Faifekau ko la ko oti ne fa-uu mo Tou nofoga-a-aliki, Tou maalosi, Tou afioga mo Tou matagofie.  Mea nei ko tavini, ko la ite taimi loa tena ne logo i Tau kalaga, e tele atu kite koga e vau iei a Tou alofa-kaimalie kae seki talave lele loa ona ko mafulifuliiga mo avanoaaga o te lalolagi nei io me ko nisi faka-lavelave aka o tagata.
     Au ko ia, O toku Atua, te la ne molimau ki Tou tasi, tela ne fakatalitonu ki Tou tafatasi, tela e ifo maulalo mai mua o te faka-asiiga o Tau afioga, kae e lavea mo te loto fanoanoa a te gali o te mainaaga o Tou matagofie maina.  Au ko oti ne talitonu kia Koe mai i tua ko oti ne iloa ne au Koe, Tela ne fakaasi mai a Koe ki mata o tagata e auala atu i te maalosi o Tou nofoga-a-aliki mo te maalosi.  Kia Koe ne fuli atu au, motu lele mai loa i mea katoa, kae piki mautakitaki ki te kafanoa o Au mea-alofa mo alofaaga.  Ko oti ne talia ne au a Tau mea tonu, mo te tonu o tulafono faka-ofoofogina katoa mo faka-matalaaga ko la ko oti ne tuku ifo ne Koe.  Ko oti au ne anapogi ona ko te alofa mo Koe mo te tautali ki Tau faka-tonuuga, kae ko fakaoti a taku anapogi mo Ou tavaeega i toku laulaufaiva pela foki loa mote tautali ki Ou fiafiaaga.  Sa fai gia au, toku Aliki, ke lau ia latou ko la ne anapogi i te ao, kae ite po ko fai olotou taga i mua o Koe kae ko se talitonu ki te mea tonu, se talitonu i Au fakailoga, teke atu ki Au faka-talitonuuga, kae fakasee Au faipatiiga.
     Tala ne Koe, O te Aliki, oku mata mo mata o latou katoa ko la ne saala kia Koe, ko te mea ke lavea Koe ne Ou tina mata loa.  Mea nei ko tau ikuuga kia matou i te Tusi tela ne aumai ki lalo ne Koe Tela ko Ia ko oti ne filifili ne Koe mai i Tou loto, Tela ko Ia ko oti ne faka-kese aka ne Koe ki alofaga mai i luga i Au mea faiite katoa., Tela ko Ia ko oti ne fiafia o fauu ki Tou nofoga-a-aliki, kae ko Ia Tela ko oti ne alofagia kae fakaeke ki Tau Fekau mo Au tino katoa.  Tavaeega e Koe, na la, toku Atua, pela mo Tou alofa-kaimalie ko oti ne fai matou ke lavea a Ia kae talia so se mea ko oti ne tuku ifo mai ia Ia, kae avatu ki luga ia matou a te faka-aloalo o maua a te fakatasi mo Ia Tela ko oti ne feagaiiga mai ne Koe i Tau Tusi mo Au Tapeleti.
     E lavea mai ne Koe au, o Toku Atua, o oku mata e faka-saga kia Koe, piki mautakitaki ki te kafanoa o Tou alofa-kaimalie faka-te-lagi, ka piki mau ki te mata o Tou alofa-atafai mo alofaaga e se lausia.  Sa-lepegia, au e akai kia Koe, oku faka-moemoega ke oko atu ki mea ko oti ne iku ia Koe mo Au tavini ko la ko oti ne fuli atu ki te koga e nofo Koe i ei mo te lafiiga o Koe, kae tautali ki te Anapogi ona kote alofa mo Koe.  Au e fakaasi tonu, O toku Atua, I so se mea tela e vau mai ia au e seai lele loa se aogaa mo Tou nofoga-a-aliki kae e se ttau foki ki Tau afioga.  Kae e uiloa, Au e akai totuli kia Koe mai i Tou Igoa tela ne fakaasi a Koe, ite matagofie o Ou igoa tafasili ite lei, ki mea faiite katoa, i te Faka-asiiga Tela ko oti a Koe, ona ko Tou Igoa tafasili ite malifalifa, fakamaina atu ne Tou gali, o tuku mai ke inu au ite uaina o Tou alofa-kaimalie mo te suamalie tonu o Ou alofaaga, ko la ne tafi mai ite lima tau-matau o Tou finagalo, ke mafai ne au o tuku taku kilo ki luga ia Koe kae e motu lele mai i so se mea na ko Koe, ko te lalolagi mo mea katoa ko la ko oti ne faiite i ei kee mafai o sae mai mua ia au pela me se aso vave tela seki talia ne Koe ke faiite.
     Au e toe akai kia Koe, O toku Atua, ke to vaiua ifo ki lalo, mai ite lagi o Tou finagalo mo kaumana o Tou alofa-kaimalie, a te mea tela ka  fulu ne ia tatou mai i te manogi masei o motou agaasala, O ko Koe Tela ko oti ne fagaigoa a Koe ki te Atua o te Alofa-Kaimalie!  A Koe, e tonu, ko te Tafasili i te Maalosi, te Matagofie-Katoatoa, te Fai-Meaalofa.
     Sa liakinagina, O toku Aliki, a ia tela ko fuli atu kia Koe, io me fakasala a ia tela ko faka-pilippili atu kia Koe o kave keatea ke mao mai i Tou fale.  Sa lepegia a faka-moemoega o latou e akai kae finafinau o fakaloa atu a olotou lima o saala a Tou alofa-kaimalie mo alofaaga, kae sa faka-seaigia a Au tavini faka-maoni ki mea faka-ofoofogina o Tou alofa-atafai mo te alofa-kaimalie.  Te Faka-magalo mo te Tafasili ite Alofa-Lauefa ko Koe, O toku Aliki, Koe e maalosi o fai ate mea e fiafia Koe ki ei.  A mea katoa na ko Koe e seai ne aogaa i mua ote fakaasiiga o Tou mafi, ko galo i mata ote faka-talitonuuga ki Tou maumea, e aunoa mo se aogaa o latou ma fakatusa ki fakaasiiga maina o Tou nofoga-a-aliki, kae mativa loa kite mativa mai i maalosi katoa mafai e mata ki mata mo failoga mo faka--talitonuuga o Tou maalosi.  Sea aka foki se lafiiga mai i tafa o Koe, O toku Aliki, tela e mafai ne au o tele o lafi kiei na ko Koe, kae e tefea foki a te koga malu e mafai ne au o fakavave ki ei?  E seai, te maalosi o Tou mafi e fai mo taku molimau!  Seai aka foki se puipui na ko Koe, seai se koga mo tele ki ei na ko Koe, seai se lafiiga na ko Koe.  Fai aka au ke tami, O toku Aliki, ki te suamalie faka-te-lagi o Tou masausauaga mo tavaeega.  Au e tautoo ki Tou mafi!  So se tino tela ko oti ne taimi ite magalo ka fakaseai katoa a ia mai i mea o te lalolagi mo mea katoa ite lagi, kae ka fakasaga atu ona mata kia Koe, fakamaa mai ite masausau o so se tino na ko Koe.
     Faka-maalosi na la a toku agaaga, O toku Atua, ki Tau masauaaga faka-ofoofogina, ke mafai ne au o fakamaluga a Tou igoa.  Se lau gina au mo latou ko la e faitau ia Au pati kae e se maua o saala ki Au mealofa funa kola, e fakatonu mai ne Koe, e aofia iei, kae e fakavave ne latou a agaaga o Au mea faiite mo loto o Au tavini.  Fai aka au , O toku Aliki, ke lau au ia latou ko la ko oko loa ite pokotia i manogi suamalie ne agiagi mai i Ou aso kae fai a latou ke tuku ifo a olotou ola mo Koe kae fakavave atu ki te koga tela ka mate iei a latou ona loa kote nnau a loto o kilo ki Tou gali mote fia oko atu kia Koe.  Kae moi fai ke isi se tino e sili atu kia latou ite olotou auala, “Koutou e olo ki fea?” ka tali atu latou penei, “Ki te Atua, te Pule-Katoatoa, te Feasoasoani i Mea Faigata, te Ola Fua ia Ia!”
     Agasala ne fai ne latou ko la ko fuli tua mai ia Koe kae ko amio fiasili kia Koe e se maua ne latou o fakatuai a te alofa o latou mo Koe, io me kote fakasaga atu o latou kia Koe, io me kote fuli atu kite auala o Tou alofa.  Latou konei ko latou kola e fakamanuia ne te Lukuuga-faka-te-lagi mai i luga, kola e fakamana ne tokoukeega o tino i Fakai lasi, mo mai tua atu ia latou ko piki i olootu mualae a Tau pene tafasili ite maluga ko oti ne tusi: “Latou konei! A tino o Bahá. Mai ia latou ko oti ne fakasae aka a te gali o te mainaaga o akoakoga.”  Tela la ko oti ne fakaeke aka i Tau pule mo Tou finagalo, i te Tapeleti o Tau ikuuga e se mafai lele o fuli.
     Faka-salalau atu, tena la, O toku Atua, a te olotou takutakua mo te takutakua o latou koi ola io me ko mate kae ko oti ne faka-tamilomilo ne latou.  Tuku mai kia latou a te mea tela ko oti ne fakaeke aka mo latou fai mea tonu i vasia o Au mea faiite.  E maalosi Koe o fai a mea katoa.  E seai aka foki se Atua na ko Koe, te Maalosi-Katoatoa, te Fesoasoani i Mea Faigata, te Mafi-Katoatoa, te Toe Alofa Tafasili  
      Sa faka-gata a motou anapogi ki te anapogi tenei, O toku Aliki, pela foki mo feagaiiga ko oti ne fai ne Koe mo te feagaiiga tenei.  Ke talia mai ne Koe a mea katoa ko oti ne fai atu ne matou mo te alofa kia Koe, ona foki ko Tou fiafiaaga, mo mea katoa ko la ko liakina ne matou seki fai ona ko te fakalogo o matou ki manakoga se lei kae se fakamaoni.  Fak- mafai aka matou, tena la, ke piki mau ki Tou alofa mo Tou faifiaaga lei, kae tausi matou mai ite masei o latou ko oti ne se-talitonu kia Koe kae fakaloi Au faka-iloga tafasili i te malifalifa. A Koe, i te tonuuga, ko te Aliki o te lalolagi nei mo sua lalolagi.  E seai aka se Atua i Ou tafa, te Malu, te Tafasili ite Maluga.
     Faka-lauefa a Koe, O te Aliki toku Atua, a ia Tela ko te Kamataga Mai ite Vavau, te Mea Lilo Faka-te-lagi, te Uiga se Lavea, te Asokamata Faka-te-lagi, mo te Faifekau o Tou Nofoga-Aliki, tela mai ia Ia ko poto katoa o taimi ko teka mo poto katoa o taimi mai mua ka faka-maina, mai ia Ia a penina o Tou atamai funa ka taala, a ko te fakaofoofogia o Tou igoa taaua ka faka-matala ko oti ne tofi ne Koe ate Tino Faka-salalau o Ia tela Tena igoa a te mataimanu B mo te mataimanu E ka soko kae fusi tasi, auala atu i Tou afioga, Tou nofoga-a-aliki mo Tou mafi ka fai ke iloagina, e auala atu ia Ia Tela Au muna ko oti ne kave atu ki tua atu, ako Tau Muna ko faiite, e auala atu ia Ia Tela a loto o Au fagasele filifilia ko tuku fakasagi, a ko latou katoa i lagi mo latou katoa ite lalolagi ko luku fakatasi, Tela ko faka-igoa ne Koe kia ‘Alí-Muhammad ite maalo o Ou igoa, mo te Agaaga o Agaaga i Tapeleti o Tau faka-asiiga se mafai o fuli, Tela ko oti ne fauu ne Koe ki Tou tina igoa, i luga i Tou igoa a nisi igoa aka katoa ko oti, mai i luga  i Tou manakooga  mo te maalosi o Tou mafi, ko oti ne fai ke foki atu,  kae ia Ia Tela ko fai ne Koe a Ou uiga lei katoa mo Ou tofiiga ke maua ia latou a te tina fakaotiiga o latou.  Ea a Ia a igoa ko la e moe funa i loto i Tau tapaneko e seai se popooga, i loto i Tou lalolagi e see lavea mo Ou fakai lasi faka-manuiagina.
     Toe fakalauefa ne Koe, na la, a latou ko la e talitonu ia Koe mo Au fakailoga kae ko fuli atu kia Koe, mai i vasia o latou ko oti ne iloa ne latou a Tou faka-tasitasi i Tena Faifekau Fakamuli – se Faifekau tela ko oti ne fai mai ne Ia i Ana Tapeleti, mo Ana Tusi mo Ana Mataupu Silisili, pela foki mo kupu gali katoa mo faipatiiga taaua ko avaifo ki luga ia Ia.  Ko te Faifekau foki tenei Tela Tena feagaiiga ko oti ne fakatonu mai ne Koe ke na fakatu a Tena feagaiiga ia Ia loa.  Ko Ia tela ko Ona tavaeega e fakamanatu ne te Bayan. I loto a Tena tafasili i te lei katoatoa ko oti ne faka-malugagina, kae faka-tumau a Tena mea tonu, ka faka-salalau a Tena nofoga-a-aliki, mo Te Fakatokaaga ko faka-tonutonu.  Faka-manuia ki tagata tela ko fuli atu kia Koe, kae faka-taunu a mea ne fakatonu mai ne Koe, O ko Koe Tela ko te Aliki o te lalolagi mo te Manakoga o latou katoa ko oti ne iloa ne latou a Koe!
      Tavaeega e o Koe, O toku Atua, mo Tou fesoasoani ke lavea kae alofa kia Ia.  Na la, au e akai totuli kia Koe ona ko Ia mo Latou Ko la ko Asokamata o Tou faka-te-lagi, mo te Faifekau o Tou Tulaga Aliki, mo Koga Tausi o Tau Feagaiiga, mo Koga e teu iei a Tou fakamalosi, ke fai aka matou ke tavini kae fakalogo kia Koe, kae faka-maalosi mai matou ke fai pela me ne fesoasoani o Tena Fakatokaaga mo te lepeega o latou teke kia Koe.  E maalosi Koe o fai a te mea e fiafia Koe ki ei.  E seai aka foki se Atua na ko Koe, te Mafi-Katoatoa, te Matagofie-Katoatoa, te Tasi tela a Tena fesoasoani e saala gina ne tagata katoa!

-Bahá'u'lláh
-----------------------

TE ANAPOGI (#10966)

Tavaeega e i luga ia Koe, O te Aliki toku Atua! Ko oti ne tautali matou ki te Anapogi pe la mo Tou manakoga kae fakagata nei ona ko Tou alofa mo Tou loto fiafia.  Faka-maulalo atu o talia, O toku Atua, a uiga lei o latou ko la ne galue katoatoa i Tou auala ona ko Tou gali mo olotou mata e fakasaga atu ki Tau Fakatokaaga, aunoa mo se isi aka na loa ko Koe.  Tena la, tuku ifo, a Tau faka-magalooga kia matou, ki luga i motou tuaa, kae ki luga foki ia latou katoa ko la ne talitonu ia Koe mo Au faka-iloga mafi i te vaaitaimi takutakua tenei, te toe Fakaasiiga tafasili i te matagofie.  E mafi Koe o fai ate mea e loto Koe ki ei. A Koe, e tonu, ko te Tafasili ite Malu, te Mafi-Katoatoa, te Se-mafai-o-Taofigina.

-Bahá'u'lláh
-----------------------

TE ANAPOGI (#10967)

Tavaeega kia Koe, O te Atua, toku Atua! Mea nei ko aso ko la ko oti ne fakasino ne Koe ki Ou taugasoa filifilia, Ou taugasoa fagasele mo Au tavini ke tautali i te Anapogi, te la ko oti ne fai ne Koe pe la me se mainaaga ki tino o Tou maalo, pe la foki mo te faiiga ne Koe a talo fakatulafonogia ke pe la me se kakeega o te olo ki luga mo latou e talia ne laou a Tou fakatasitasi.  Au e akai totuli kia Koe, O toku Atua, ona ko pou maalosi e lua konei, ko oti ne fakaeke ne Koe mo tino katoa te la ko te mana mo te fakaaloalo, ke puipui a Tau lotu ke sao mai i te faitogafiti o latou fakatau see mo alamatiiga o so se tino masei.  O te Aliki, sa funa gina ate mainaaga te la ko oti ne fakaasi ne Koe mai iI Tou maalosi mo Tau pule.  Feasoaasoani, na la, latou ko la e talitonu fakapa-tonu kia Koe mo lukuuga e lavea mo te see lavea ne Tau pule mo Tou nofoaga-aliki.  E seai se Atua na ko Koe, te Mafi-Katoatoa, te Tafasili i te Maalosi.

-Bahá'u'lláh
-----------------------

TE ANAPOGI (#10968)

O toku Atua mo toku Matai!  E lavea ne Koe au i vasia o Au mea faiite ko la ne teke kae agasala kia Koe.  I so se taimi e kami ne au a latou ki vasa o Tou poto, a te olotou teke ki Tau Fakatokaaga e gasolo aka loa o maalosi a ko te see talia ne latou a te Malumalu o Tau Finagalo e fanaka o matolu maalosi.  E akai fakamaulalo atu kia Koe, O toku Atua, ona ko latou ne anapogi ona ko te olotou alofa mo Koe kae inu ite vai ola ote fakalogo mai i lima o Tou alofa-lauefa, ke fakaeke mo Au fagasele, ko la mai lalo i te ulaaga o te lukuuga fakatamilo o Au tofooga ko oti ne piki mmau ki te kafanoa o te onosai, a mea lei katoa ko oti ne lau ne Koe i Au Tusi mo Au Tapeleti. Na la, tusi aka ki lalo, mo latou ko la ne pokotia i fakalavelave ona ko Koe, a te taui o latou ko la ko toi ne mate faka matulo I te auala o Tou fiafiaaga-lei.  Tuku ifo ki lalo, tena la, kia latou, O te Aliki, ate mea te la ka faka fiafia ki olotou loto, faka-mafanafana olotou mata, kae fakaola olotou agaaga.  Ko Koe, e tonu, ko te Tafasili i te Maalosi, te Tafasili I te Malu, te Fesoasoani i Fakalavelave, te Poto-Katoatoa, te Atamai-Katoatoa.

-Bahá'u'lláh
-----------------------

TE ANAPOGI (#10969)

E malu e o Koe, O te Aliki toku Atua!  Au e akai totuli kia Koe ona ko latou ko oti ne fakatonu ne Koe ke tautali ite Anapogi ona ko Tou alofa mo te fiafia lei, ko la ko oti ne fakaasi a te olotou tautali ki Tau tulafono kae usiusitai ki Au kupu mo akokaoga, kae ko la ko oti ne faka-gata a te olotou anapogi kae e fiafia ite olotou pili atu kia Koe kae lavea Ou mata.  I te matagofie o Koe!  Ona ko fuli atu latou ki kogaa-mea o Tou fiafia-lei, aso katoa o latou ne aso o te anapogi.  Moi fai ke muagutu atu a Tou finagalo kia latou kae fai atu penei: “Tautali, ona ko Au, a te anapogi, O tino, kae e se faka-tapulagia a tona leva,”  Au e molimau ite afioga o Tou matagofie, me ia latou katoa taki tokotasi ka tautali i ei mo te fakamaoni, ka se fai ne latou mea ko la ka soli a Tau tulafono, kae ka tumau o fai ne latou ke oko ki taimi a olotou agaaga ola ka tuku atu kia Koe, auaa ko oti latou ne tami ite suamalie o Tau kalaga, kae ko konaa latou i Tou masausauaga mo taveega mo muna e aumai i laugutu o Tau fakatonuuga.
     Au e akai totuli kia Koe, O te Aliki, mai ia Koe, te Maluga, te Tafasili ite Maluga, ko Tau Faifekau Fakamuli Te la mai i ei a te maalo o igoa mo te maalo o uiga lei katoa ko oti ne tapaki, ako tino I te lalolagi mo te lagi ko konaa, ako latou katoa ko la e nofo i lalolagi o te Faka-asiiga mo te foafoaaga ko polepole na lo ko latou ko la ne anapogi mai i mea katoa ko la e see fiafia Koe ki ei kae fakalave latou mai te fuli atu ki sose mea na ko Koe, kae aofia atu matou i ei kae tusi ifo a motou igoa i te Tapeleti tela ne tusi ne Koe a olotou igoa. O te Atua, mai i luga i mea faka-ofoofogina o Tou mafi mo mea-alofa o Tou nofoaiga-a-tupu mo te matagofie, ne tuku mai ne Koe a olotou igoa mai i te tai o Au igoa, kae faiite a olotou tina uiga tonu mai i te kogaa-mea o Tou alofa, mo olotou kanoloto mai ite agaaga o Tau Talitonuuga.  A latou seai ko te toe fakatasi tela ne tautali atu kiei ne te mavae, se fakapilipili e seiloa se mao o ia, mo se faka-tumauuga e seai sena gataga.  E tonu, a tavini konei ko la e fesokotaki kia Koe, e siomio loa ia koe ki te se gata mai, kae luku faka-tamilomilo i te fale malu o Tou nofo-mai mo te Kaaba o te toe feiloaki mo Koe.  Ko oti ne fakatonu mai ne Koe, O toku Atua, e seai se kesekesega i te va o latou mo Koe, na loa ma fai ko maua ne latou a mainaaga o te faka-fetaui mo Ou mata, e fakasaga atu olotou mata kia Koe, kae ifo latou mai mua o Tou gali, fakalogo katoa ki Tou taua kae motu mai i mea katoa na ko Koe.
     Ko oti ne anapogi matou ite aso tenei, O toku Aliki, mai i Tau faka-tonuuga mo Tau manakoga pela loa mo te mea e fai mai 
Tau fakaasiiga i Tau Tusi tafasili i te maina.  Ko oti ne taofi a motou agaaga ola mai i motou manakoga plea foki mo so se mea te la e se lei kia Koe ke oko ki te aso ko vau o fakaoti mo te taimi ko oko mai ke fakagata a te Anapogi.  Aunoa mo se pogai, au e akai totuli kia Koe, O te Manakoga o loto o fapelepele maalosi mo te Fagasele o agaaga ola o latou ko la e iai ia latou ate malamalama, O Fiafiaaga o fatafata o latou ko la e kausaki kia Koe mo te Pogai o te manakoga o latou ko la e saala kia Koe, ke fai aka latou ke lele i te vanimonimo o Tou pilipili mai mo te lagi o Tou nofo-mai, kae ke talia mai ia matou a motou taumfaiiga i te auala o Tou alofa mot e fiafia lei.  Tusi aka a motou igoa, tena, i tafa o latou ko oti ne faka-talitonu a Tou tafatasi kae molimau atu ki Tou tokotasi lele loa kae ko oti ne faka-maulalo latou mai mua o faka-talitonuuga o Tau afioga mo alofaaga o Tou matagofie, latou ko oti ne lafi i loto i Tou pili mai kae salasala atu ke lafi atu kia Koe, latou ko la ko oti ne fakamaumau a olotou olaga i olotou fiafia o fetaui mo Koe kae ke oko atu kite fale o Tou nofo-mai, kae ko latou ko la ko oti ne liakina a te lalolagi ki tua i olotou tua ona ko te alofa mo Koe kae motu mai so se sokoga mo se isi mea na ko Koe i te olotou finafinau o faka-pilipili atu kia Koe.  A tavini konei ko la olotou loto ko liua i te maalosi o te manako ki Tou gali ite takuuga o Tou Igoa, ka ko olotou mata e sofisofi i loimata i te salasalaaga kia Koe kae ke ulu atu kite tafafale o Tou fale.
     Te mea tenei, O toku Aliki, ko toku laulaufaiva te la e molimaugia ki Tou faka-tasitasi mo te seai se fakatusagia, toku mata te la e kite ki te nofoaga o Tou kaimalie mo faka-manuiaaga e lausa, mo toku taliga te la ko toka o fakalogo ki Au faka-tonuuga mo Au faipatiiga, aua ia au e talitonu, O toku Atua, me ko oti ne fakasino ne Koe a pati e aumai mai i te muagutu o Tou finagalo ko la e seai se gataga, kae kia latou a taliga ko oti ne fakamana ne Koe ke logo i Au muna mo kupu i taimi katoa e lagonagina.  Kae konei ko oku lima, O toku Aliki, e sisi ki luga i te lagi o Au alofaaga mo te alofa-kaimalie.  E pefea la, e fuli ne Koe keatea a ia faka-alofa tenei te la ko oti ne aumai ne ia kia ia e seai aka foki na ko Koe, e seai aka foki se faka-ekeega mai i tafa o Koe, io me se tupu na ko Koe, e seai se maluuga na mai i lalo ote malu o Tou alofa-kaimalie, kae e seai se lafitaga vagana mai mua i Tou mataloa, te la ko oti ne tala ne Koe kia latou katoa ko la e nofo i Tou lagi mo Tou lalolagi?  Ikaai, mai i luga i Tou matagofie!  Au ko ia tela a tena talitonu i Tou alofa-atafai e tumau aunoa mo se mataku e uiloa e aumai ne Koe kia au a faka-osoosoga ki te leva o Tou maalo; kae ka fai e sili mai se tino e uiga kia Koe, a sokooga katoa o toku fuaitino e pakalaga: “A Ia e fagasele i Ana galuega kae fakalogo ki Ana faka-tonuugaa, e alofa i Tena natula kae atafai ki Ana mea ola faiite!”
     A Tou mafi e fai mo aku molimau, O te Fagasele Lei o loto o latou ko la e salasala kia Koe, moi fai e fuli mai keatea ne Koe au mai i Tou mataloa kae liakina au ki pelu tau o tino fiataua i vasia o Au tavini mo kofe kini a latou, kae ka fai se tino e sili mai kia au kia Koe, a laulu katoa o toku fuaitino e faipati atu penei: “A Ia, e tonu, a te Fagasele o lalolagi;  a Ia kote Toe Tafasili ite Maumea-Lauefa; a Ia ko te Fakatuanaki-Tumau katoatoa!  E futi ne Ia au ke pili atu kae fakamao au mai ia Ia; e talia au ki Tena malumalu kae fakatapu ne ia au mai i Tena nofo-mai.  E seai aka ne maua ne au e alofa atu ia Ia tenei, te la ko tu tokotasi au mai i mea katoa na ko Ia kae ko oti ne ola aka au mai i luga atu i mea katoa na loa ko Ia.”
     E lei mo ia tokotasi, O toku Atua, te la ko oti ne faka-maumeagia ne Koe ko ala i ei o tu tokotasi mai i maalo o te lalolagi mo te lagi.  E maumea a ia tokotasi te la ko oti ne puke mmau ki te kafanoa o Tou maumea, e fakalogo katoatoa mai mua o Ou mata, te la  ko Ia e ola ia Ia loa mai luga atu i mea katoa.  E mativa ia tokotasi te la ko fakaseai a Koe, kae ko fakaasi ate faka-matamata mai i Ou mua, fuli keatea mai i Tou nofo-mai, kae fakaasi a te se talitonu i Au fakailoga.  Fai aka au, tena la, O toku Atua toku Fagasele, ne to iloto ia latou ko la ate agiagi ote matagi o Tou finagalo ka faka-gasue a latou, seai mo latou ko la a te matagi o te fuaitino mote fiafia e kosu kae futi ki te koga te la e fiafia kiei.  E seai aka foki se Atua na ko Koe, te Mafi katoatoa, te Tafasili i te Maluga, te Tafasili i te Maumea-Lauefa.
     A matagofie katoa e o Koe, O toku Atua, me ne faka-mafai ne Koe mo te alofa ke anapogi au i te masina tenei te la ko oti ne faka-soko ne Koe ki Tou Igoa, te Tafasili i te Maluga, te la e fakaigoa kia ‘Alá (Loftiness – Maluga).  Ko oti ne fakatonu ne Koe ko Au tavini mo Ou tino ke anapogi i taimi tena kae futi atu ke fakapilipili atu kia Koe.  A aso mo masina o tausaga e fakaoti ki te Anapogi, e ui iei a te masina muamua e fakaigoa ki Tou igoa, Bahá, ko mafi katoa e molimau ia Koe ko te Kamataga mo te Fakaotiiga, te Fakaasi mo te Funa, kae ke iloa tonu i igoa katoa e tuku mai fua mai ite matagofie o Tau Talitonuuga mote muna e faka-matala mai i Tou finagalo kae fakaasi mai i luga i Tau fekau.  Ko oti ne fakatonu mai ne Koe i te masina tenei ke masaua kae faka-aloalo mai ia Koe, mo te failoga o Tou nofomai i vasi o tagata, ko te mea ke se puli ia latou a Tou gali mo Tau afioga, Tou nofoaiga-a-tupu mo Tou matagofie, kae ke mautinoa tonu mai i te taimi ko moleva ko oti kae ko leva Koe ne fai pe la me ko Tupu mai i luga i te foafoaaga katoatoa.  E seai se mea ne faiite i te lagi mo te lalolagi e mafai o faka-lavelave ki Tau pulega, io me se tino i lalolagi o Faka-asiiga mo te foafoaaga e mafai o taofi a Koe mai ite faka-taunuu a Tau galuega.   
     Au e akai totuli kia Koe, O toku Atua, mai i Tou igoa tela a tino katoa i te lalolagi ko oti ne nofo mo te fanoanoa, na loa ko latou ko la ne puipuigina ne Koe i Tau puipuiiga mautinoa tonu kae mmalu mai lalo ite ata o Tou alofa lasi, ke fai matou ke mautakitaki i Tau Talitonuuga kae faka-tunaka i Tou alofa ko te mea kafai ko tu o teke atu Au tavini ako Ou tino ko fuli keatea mai ia Koe, ko seai se tino e toe i luga i te lalolagi o kalaga ki Tou igoa io me o fakasaga ona mata ki kogaa koga e sokotaki mo Koe mo te Kaaba o Tou mana, e mafai loa ne au o tu ki luga tokotasi kae ko au loa ia au o te Au tavini ke tu ki luga o galue ki Tau talitonuuga manumaalo, o faka-maluga a Tau muna, o fakasalalau a Tou nofoaiga-a-aliki, kae o faka-manuia a vikiiga o Koe tafasili te malu.  Ka ko te mea tenei, O te Aliki, e uiloa a taimi taki tasi e taumafai au o faka-maluga a Koe i sose igoa, au e fonu faeloa i te numi, ona ko au e mautinoa tonu a uiga lei katoa o Koe mo igoa tafasili i te lei ko la e o Koe kae ko la e fai talosaga atu ki Tou nofo-mai tafasili i te mana, e seai lele se mea e fakaasi mai na ko te fua i ei a toku malamalama, pe la loa ma fai e taku ne au se igoa me e tavaegia, e fai faeloa ne au kia Koe. 
     E se fuafuagina a te maluga o Tou nofoga tonu mai i luga i se faka-matalaga io me poto a sose tino na ko Koe, kae fakamana a Koe mai i faka-manuiaag a Au mea ola faiite, mo tavaeega a Au tavini i te taumafaiiga a latou o olo atu ki luga ia Koe.  So se mea e sae mai i Au tavini e se katoatoa ona ko te se katoatoa o latou foki loa kae ne faiite mai iI olotou manatu mo mafaufauga fakasupsupa. 
     E faka-fanoanoa, e faka-fanoanoa, O toku Fagasele, mo toku se lava o vikia a Koe fakalei pe la foki mo aku mea see i Ou aso!  Kafai e tavae ne au a Koe, O toku Atua, me ko Ia Tela e iloa a mea katoa, e iloa ne au fakavave me kafai e tusi a Koe ki se fatu seai se leo  mo se maikao e tasi o Tou finagalo, e mafai ne Koe o fai ke fakaasi mai ne te fatu a poto o vasia taimi katoa ko teka mo taimi mai mua; kae ka fai e tavae ne au Koe me ko te Maalosi-Katoatoa, e maua ne au i te muna e tasi e vau ite muagutu o te pogai tonu o Koe ko lava loa i ei o fakanumi fakamataku a lagi mo te lalolagi.
     A tou matagofie e molimau ne au, O te Fagasele mo latou ko la e lavea ne latou a Koe, kafai a te tino poto e se fakaasi ne ia a tena valea i mua o fakaasiiga o Tou poto, ka lau a ia me ko toe tino valea mai i Au tino; kae kafai se tino mafi e se talia ne ia o fakaasi a tena seva i mua i faka-talitonuuga o Tou maalosi, ka taku a ia me ko toe tino seva mo te tafasili i te se fakalogo mai i Au mea ola faiite.  Ona ko toku iloa mo te mautinoa tonu ote tulaga tenei, e mafai pefea ne au o tavae a Koe io me o faka-matala kae tavae a Koe?   Tena la, ona ko oku vaivaiiga, au ko fakavave ki te malu o Tou maalosi, ona ko toku mativa, ko lafi au mai i te malu o Tou maumea; kae e iloa ne au a te seai soku maalosi, ko fanatu au ki luga o tu mai mua o te tapaneko o Tou maalosi mo te mafi.  Kae ka se fakaaoga pefea ne Koe a ia faka-alofa tenei kae e seai aka foki ne mmau kiei na ko Koe me ko tena lafiiga, io me o fuli keatea a ia kese tenei kae e seki maua ne ia a se isi aka na ko Koe tela ko tena fakasele tonu?
     E iloa ne Koe a mea katoa ko la i loto ia au, O te Aliki, kae e seiloa ne au a se mea i loto ia Koe.   Alofa mai kia au mai i luga i Tou alofa atafai kae faka-maalosi mai au mo mea ko la e aumai a te filemu ki toku loto i Ou aso mo te tokaaga ki toku agaaga ola mai i luga i te faka-asiiga o te mana o Tou nofo-mai.  A mea faiite katoa ko oti ne fakamaina ki te gali o mainaaga o Ou mata, O te Aliki, a ko mea e nofo i te lalolagi mo te lagi ko maina malifalifa ona ko fakaasiiga o Tou afioga se-fakatusaagia, i se auala te la e seai lele se mea e tago lima au kiei vagana e puke muamua ne au a te fakaasiiga o Koe, se faka-asiiga te la ne funa mai ite kiloga a latou i vasia o Au tavini ko la e to lei a olotou moe.
     Sa-faka-seaigia au, O toku Aliki, mai i Tou alofa te la e aofia i ei a lalolagi katoa o te foafoaaga, e lavea io me e se lavea.  Ka nofo mao Koe, O toku Atua, kae ko oti la ne kami ne Koe a tino katoa ke foki atu kae faka-pilipili atu kia Koe, kae faka-maalosi atu kia latou ke puke mmau ki Tau kafanoa?  Ka liakina ne Koe au, O toku Fagasele, e uiloa ko oti ne feagaiga ne Koe i Tau Tusi tafasili ite mana mo Au kupu tafasili ite gali o luku mai katoa a latou ko la e tagi tagi kia Koe i loto ite fale o Tou atamai atafai, pela foki mo latou ko la e manako kia Koe mai lalo o te ata o Au mea-alofa lauefa, pela foki mo latou kola e salasala kia Koe mai i lalo o te faleie o Tou alofa mo kaimalie atafai?
     Au e tauto ki Tou mafi, O toku Atua, i aku tagi fanoanoa ko oti ne taofi ne latou a toku fatu, mo ona tagi tagi ko oti ne puke ne latou a te maalosi i oku lima!  I so se taimi e toe faka-talitonu au kae faka-fiafia a toku agaaga ola mo mea gali o Tou alofa-kaimalie, a mea-alofa o Tou atamai matagofie, mo faka-talitonuuga o Tou kaimalie, au e polepole mai mua o faka-asiiga o Tou fai-meatonu mo fakailoga o Tou kaitaua.  E lavea ne au ia Koe e iloagia ne igoa e lua konei kae faka-matalagia ne uiga e lua konei, kae e ui iei a Koe e atafai faitalia me ne kalagagia a Koe ne Tou igoa ko te Fakamagalo-Katoatoa, io me ko Tou igoa te la ko te Kaitaua.  Mai i Tou silisiliese, moi fai seai ko toku iloa i Tou alofa-kaimalie e sopoia atu i mea katoa, a totooga o toku fuaitino katoa ko leva ne seai, ko toku tina fuaitino ko leva ne fakaseai ako toku kano tino i loto ko oti ne toli ifo ki te seai lele loa.  Kae kafai e puke atu ne au i Tou alofa-kaimalie e aofia i ei a mea katoa a ko Tou alofa-kaimalie e lau katoa i ei a te foafoaaga katoatoa, toku agaaga ola mo toku kano tino iloto ko lagona a te mautinoa tonu.
     E faka-anoanoa, e faka-fanoanoa, O toku Atua, i mea ko la ko seke mo au i Ou aso, kae e fakafoki atu, e fakafanoanoa, e fakafanoanoa, O te Manakoga o toku fatu, mo mea ko liakina ne au e seki oti ne fai i te galuega mo te fakalogo kia Koe i taimi o Ou aso se mea te la e seki-laveagina aka loa ne mata o Au tavini filifilia kae faka-naagia!  Au e akai kia Koe, O toku Aliki, mai i luga ia Koe mo te Faifekau o Tau Talitonuuga Te la e sagasaga i luga i te nofoaga-a-tupu o Tou alofa-kaimaie, ke fakammau au i Tau galuega mo te fiafia-lei.  Puipui mai au, tena, mai ia latou ko la ko oti ne fuli keatea mai ia Koe kae ko se talitonu ki Au muna, ko fakaloi ne latou a Tau mea tonu, teke atu ki Au faka-maoniiga, kae ofa ne latou a Tau Feagaiiga mo fakatalitonuuga.
     Ko vikiiga katoa, O te Aliki toku Atua, ki luga ia Ia Te la ko te Faifekau o Tou Tina Uiga tonu, ko te Aso malulu o Tou tafatasi, ko te Koloa o Tou poto, ko te Koga e puna mai i ei a Tau Fakaasiiga, ko te koga e teu i ei a Tou faka-maalosiiga, ko te nofoga o Tau nofoaiga-a-tupu, mo te Malumalu o Tou Faka-te-agaaga – Ko ia Te la ko te Poini Muamua Loa, te Tafasili i te Maluga Ona foliga, te Aka i te Favavau, mo te Faka-olataga o maalo; mo te manuia ia ia te la muamua loa ne talitonu ia Ia mo Ana muna, te la ne fai ne Koe se nofoga-a-tupu e tusa mo tena fanaka ki te Muna tafasili i te maluga, se poini e luku ki ei a faka-asiiga o Ou igoa tafasili i te lei, a aso malulu o te mainaaga o te Laa o Tou atamai, a te fale tapuaki mo te sae mai o Ou igoa mo uiga, mo te fale teu o penina o Tou atamai mo Au fakatonuuga.  A ko faka-loaloga katoa mo ia te la ka vau fakamuli kia Ia, te la a tena vau e pe la mo Tena oko mai, ako Au faka-asiiga ia ia e pe la mo Tau fakaasiiga ia Ia, na fua ko ia ne fakamaina ki te mainaaga o Ona mata kae ifo totuli a ia mai i Ona mua kae tauto ki tena tavini kia Ia; mo te matagofie i luga ia latou ko la ne mate fakamatulo i Tena auala kae ne ofo a olotou ola ona kote alofa mo Tou gali.
     Matou e molimau, O toku Atua, ia latou konei ko tavini ko la e talitonu kia Koe mo Au faka-iloga, ko la ko toi ne sala atu kite malumalu o Tou nofo-mai kae agai atu ki Ou mata, ko la ko oti ne fakasaga a olotou mata ki te fale o Tou pili mai kae sasale i te auala o Tou fiafia-lei, ko la e tapuaki kia Koe pe la mo Tou manakoga kae motu a latou mai i mea katoa na ko Koe. O te Aliki, tuku atu ki luga i olotou agaaga mo olotou fuaitino i taimi katoa a se tusaga o te gali o Tou alofa-kaimalie te la e aofia i ei a tino katoa.  A Koe, e tonu, ko te maalosi o fai a te mea e fiafia a Koe ki ei.  E seai aka se Atua na ko Koe, te Mafi-Katoatoa, te Matagofie-Katoatoa, Te la a Tena fesoasoani e makaogia ne tagata katoa.
     Au e akai totuli kia Koe, O te Aliki, me ko Ia mo latou, pe la foki mo Ia Te la ne fakatu i luga i te nofoga-a-tupu o Tau Talitonuuga kae fai ke malusia a latou katoa ite lalolagi mo te lagi, kae fakama a matou mai i agasala, ke fakeke mo matou ate nofoaga o te mea tonu i Tou nofo-mai kae fai matou ke sokotaki mo latou ko la ko fili ote lalolagi mo olotou malaia e seki mafai o taofi mai ate fuli o matou kia Koe.  Ko Koe, e tonu, ko te Maalosi-Katoatoa, te Tafasili i te Maluga, te Puipui, te Fakamagalo-Katoatoa, te Tafasili ite Alofa-Kaimalie.

-Bahá'u'lláh
-----------------------

